رحمن ڈکیت نہیں، سردار عبدالرحمن تھے فلموں میں سب کچھ حقیقت نہیں،رکن سندھ اسمبلی

لیاری سے منتخب رکن سندھ اسمبلی یوسف بلوچ نے اہم انکشاف کرتے ہوئے کہا ہے کہ رحمن ڈکیت دراصل “ڈکیت” نہیں بلکہ سردار عبدالرحمن تھے، جو لیاری میں سماجی کاموں کے لیے جانے جاتے تھے۔ انہوں نے میڈیا میں رحمن سے متعلق بنائی گئی فلموں اور کہانیوں کو حقیقت سے دور قرار دیا۔

یوسف بلوچ نے کہا کہ لیاری کو چند افراد کے اعمال کی بنیاد پر بدنام کرنا درست نہیں۔ “اگر 30 سے 35 لوگ قانون ہاتھ میں لے لیں تو اس کا مطلب یہ نہیں کہ پورا لیاری مجرم ہے۔ کراچی کے دیگر گینگز کو بھی دیکھا جائے، صرف لیاری کو کیوں نشانہ بنایا جاتا ہے؟”انہوں نے کہا کہ جس علاقے پر فلم بنائی گئی، وہ اسی علاقے کے منتخب نمائندے ہیں، اس لیے حقائق کو وہ بہتر جانتے ہیں۔ “کلاکوٹ، سنگولین، نوالین اور شاہ بیگ کو ہمیشہ ٹارگٹ کیا جاتا رہا ہے، حالانکہ میں جانتا ہوں کہ حالات کیسے تھے۔”یوسف بلوچ نے اس بات پر زور دیا کہ رحمن کو غلط طور پر ‘ڈکیت’ کہا گیا۔ “وہ بلوچ روایت کا ایک اچھا اور مددگار شخص تھا۔ لوگوں کے کام آتا تھا، اس کے بارے میں یک طرفہ تاثر پھیلایا گیا۔”انہوں نے مزید کہا کہ فلموں میں بہت سی چیزیں فرضی ہوتی ہیں، اسی طرح لیاری کے بارے میں بھی کئی کہانیوں کو بڑھا چڑھا کر پیش کیا گیا۔ یوسف بلوچ نے مطالبہ کیا کہ لیاری کے بارے میں حقائق کو درست تناظر میں دیکھا جائے اور اس کی مثبت پہچان کو بحال کیا جائے۔