اشنا شاہ اور حمزہ امین کے ہاں پہلے بچے کی پیدائش، تصاویر شیئر کر دیں

کراچی: پاکستان کی معروف اداکارہ اشنا شاہ اور ان کے شوہر حمزہ امین کے ہاں پہلے بچے کی پیدائش ہوئی ہے، جس کی خوشخبری اداکارہ نے سوشل میڈیا پر مداحوں کے ساتھ شیئر کی ہے۔

اشنا شاہ نے فوٹو اینڈ ویڈیو شیئرنگ ایپ انسٹاگرام پر اپنے نومولود بیٹے کی تصویر شیئر کرتے ہوئے اسے پیار سے “ننھا شیر” قرار دیا اور کہا کہ اس کی آمد نے ان کی پوری دنیا بدل کر رکھ دی ہے۔ اداکارہ نے مزاحیہ انداز میں بیٹے کی روزمرہ روٹین کا ذکر کرتے ہوئے لکھا کہ فی الحال اس کا کام صرف دودھ پینا، سونا اور اسی عمل کو دہرانا ہے۔

تصاویر میں نومولود کو شیر سے مشابہہ خوبصورت لباس پہنے دیکھا جا سکتا ہے جبکہ بیک گراؤنڈ میں مشہور اینیمیٹڈ فلم “دی لائن کنگ” چل رہی تھی۔ اشنا شاہ کی اس پوسٹ پر شوبز شخصیات اور مداحوں کی جانب سے مبارکباد اور نیک تمناؤں کے پیغامات کا سلسلہ جاری ہے۔

واضح رہے کہ اداکارہ اشنا شاہ اور پیشہ ور گالفر حمزہ امین سال 2023 میں رشتہ ازدواج میں منسلک ہوئے تھے اور یہ اس جوڑے کا پہلا بچہ ہے۔