طلاق کے بعد عون چوہدری سے دوبارہ شادی، نور بخاری نے خاموشی توڑ دی

پاکستان کی سابقہ معروف اداکارہ نور بخاری نے اپنے سابق شوہر عون چوہدری سے طلاق کے بعد دوبارہ رشتۂ ازدواج میں منسلک ہونے کے فیصلے پر پہلی بار تفصیلی گفتگو کرتے ہوئے اسے اللہ کی خاص مرضی اور ایک معجزہ قرار دیا ہے۔ ایک حالیہ انٹرویو کے دوران نور بخاری نے بتایا کہ انہوں نے طلاق کے بعد دوبارہ شادی کے بارے میں بالکل نہیں سوچا تھا، تاہم جب انہوں نے تمام گلیمر چھوڑ کر دین کی راہ اختیار کی تو شاید اللہ تعالیٰ نے ہی عون چوہدری کے دل میں یہ فیصلہ ڈال دیا۔ انہوں نے مسکراتے ہوئے کہا کہ شاید دونوں کے درمیان محبت کبھی ختم ہی نہیں ہوئی تھی، اسی لیے وہ تمام تر حالات کے بعد دوبارہ ایک ساتھ زندگی گزار رہے ہیں اور اس فیصلہ پر انتہائی خوش ہیں۔

نور بخاری نے اپنی ازدواجی زندگی کے حوالے سے بات کرتے ہوئے کہا کہ ایک بار طلاق کے بعد اسی شخص سے دوبارہ شادی ہونا اور پھر خوشگوار زندگی بسر کرنا کسی معجزے سے کم نہیں، جس پر وہ اللہ کا شکر ادا کرتی ہیں اور دعا گو ہیں کہ اللہ ان کے رشتے کو نظرِ بد سے محفوظ رکھے۔ اپنے شوہر کی تعریف کرتے ہوئے انہوں نے عون چوہدری کو انتہائی نیک دل اور بہترین انسان قرار دیا اور بتایا کہ ان کے بچے بھی عون سے شدید محبت کرتے ہیں۔ نور کا کہنا تھا کہ اپنے والد کے بعد انہوں نے عون کی صورت میں ایسا ہی ایک مخلص شوہر پایا ہے۔ واضح رہے کہ نور بخاری کی پہلی شادی عون چوہدری سے ہوئی تھی جو طلاق پر ختم ہوئی، جس کے بعد نور نے مزید دو شادیاں کیں لیکن وہ بھی نہ چل سکیں۔ بعد ازاں انہوں نے عون چوہدری سے دوبارہ شادی کر لی جو ان کی چوتھی شادی ہے۔