ٹرمپ نے عمان کو آبنائے ہرمز میں مداخلت پر حملے کی دھمکی دیدی

امریکی صدر ڈونلڈ ٹرمپ نے عمان کو شدید نتائج سے خبردار کرتے ہوئے کہا ہے کہ اگر عمان نے آبنائے ہرمز میں امریکی اقدامات یا کوششوں میں کسی بھی قسم کی مداخلت کی کوشش کی تو اس کے خلاف براہِ راست فوجی حملہ کیا جائے گا۔ امریکی میڈیا کو دیے گئے ایک انٹرویو میں صدر ٹرمپ نے یہ دعویٰ بھی کیا کہ امریکی انتظامیہ نے ایرانی پاسدارانِ انقلاب (IRGC) کے ساتھ بیک چینل اور پسِ پردہ رابطوں کے ذریعے ایک محفوظ اور براہِ راست مواصلاتی راستہ قائم کر لیا ہے۔صدر ٹرمپ نے عمان کو خبردار کیا کہ آبنائے ہرمز میں امریکہ کی عسکری و بحری کارروائیوں کے راستے میں رکاوٹ ڈالنے کی صورت میں فوری ردِعمل دیا جائے گا۔ واضح رہے کہ اس سے قبل مئی میں بھی امریکی صدر نے عمان کو حملے کی دھمکی دی تھی۔ امریکی صدر کے مطابق پاسدارانِ انقلاب کے ساتھ امریکہ کے پسِ پردہ مذاکرات اور براہِ راست رابطے کا سلسلہ بحال ہوا ہے۔ٹرمپ نے کہا کہ امریکہ کے پاس اب بھی جدید اور درمیانے درجے کے ہتھیاروں کے انتہائی وسیع ذخائر موجود ہیں، اور اب تک کے آپریشنز میں جتنی جنگی صلاحیت استعمال کی گئی ہے وہ نا ہونے کے برابر ہے۔