حکومت نے روکا تو تحريک گھیراؤ میں بدل جائے گی، حافظ نعیم الرحمان

جماعت اسلامی پاکستان نے ملک میں بڑھتی ہوئی مہنگائی، بجلی کے ظالمانہ بلوں، پٹرولیم لیوی، آئی پی پیز (IPPs) اور حکومتی بدعنوانیوں کے خلاف آج چاروں صوبائی دارالحکومتوں میں بیک وقت احتجاجی دھرنے دینے کا باضابطہ اعلان کر دیا ہے۔ منصورہ لاہور میں پریس کانفرنس سے خطاب کرتے ہوئے امیر جماعت اسلامی پاکستان حافظ نعیم الرحمان نے بتایا کہ لاہور میں وزیراعلیٰ ہاؤس جبکہ کراچی، پشاور اور کوئٹہ میں گورنر ہاؤسز کے باہر دھرنے دیے جائیں گے۔ پنجاب اور دیگر صوبوں سے مظاہرین شام 4 بجے اپنے اپنے مقررہ راستوں سے مارچ کرتے ہوئے دھرنے کے مقامات پر پہنچیں گے۔

حافظ نعیم الرحمان نے حکومت اور آئی ایم ایف کی معاشی پالیسیوں پر شدید تنقید کرتے ہوئے کہا کہ حکومت نے آئی ایم ایف کے مقررہ ہدف سے بھی زائد لیوی وصول کر کے غریب عوام کی جیبوں پر ڈاکہ ڈالا ہے، جبکہ اشرافیہ کو سالانہ 17 ارب ڈالر کی مراعات دی جا رہی ہیں۔ انہوں نے حکومتی اخراجات میں کمی کا مطالبہ کرتے ہوئے کہا کہ سرکاری افسران سے بڑی گاڑیاں واپس لے کر انہیں 1300 سی سی گاڑیوں پر منتقل کیا جائے اور حکمرانوں کے شاہانہ اخراجات بند کیے جائیں۔ امیر جماعت نے واضح کیا کہ آئی پی پیز کو بغیر بجلی بنائے اربوں روپے کی کیپیسٹی پیمنٹ دینا سراسر ظلم ہے اور جماعت اسلامی عوام کو ریلیف دلوانے کے لیے یہ جدوجہد جاری رکھے گی۔