گنجائش ختم! خیبرپختونخوا میں ایمرجنسی کا معاملہ فیصلہ کن مرحلے میں ہے: محسن نقوی

وفاقی وزیر داخلہ سینیٹر محسن نقوی اور گورنر خیبر پختونخوا فیصل کریم کنڈی نے صدرِ مملکت آصف علی زرداری سے ملاقات کرکے صوبے کی امن و امان کی ابتر صورتحال پر تفصیلی بریفنگ دی ہے، جس کے بعد وفاقی حکومت نے کے پی میں ایمرجنسی نافذ کرنے کا حتمی فیصلہ کر لیا ہے۔ اسلام آباد میں میڈیا سے گفتگو کرتے ہوئے وزیر داخلہ محسن نقوی نے واضح کیا کہ خیبر پختونخوا میں ایمرجنسی کے نفاذ کا معاملہ اب فیصلہ کن مرحلے میں داخل ہو چکا ہے اور اس حوالے سے مزید گنجائش باقی نہیں بچی۔ انہوں نے اشارہ دیا کہ اس صورتحال سے بچنے کے لیے بھرپور کوششیں کی گئیں، جبکہ حتمی آئینی منظوری کے لیے وفاقی کابینہ کا ہنگامی اجلاس کل صبح طلب کر لیا گیا ہے جہاں صدرِ مملکت اور وزیراعظم کی زیرِ صدارت ہونے والے فیصلوں کی توثیق کی جائے گی۔