آزاد کشمیر الیکشن: نتائج کو’’فارم 47 پلس‘‘ کے نام سے یاد رکھا جائیگا: شرجیل میمن

سندھ کے سینئر وزیر اور پاکستان پیپلز پارٹی کے رہنما شرجیل انعام میمن نے میاں نواز شریف اور وزیراعلیٰ پنجاب مریم نواز کے حالیہ بیانات پر سخت ردعمل دیتے ہوئے کہا ہے کہ آزاد کشمیر کے انتخابات کے نتائج کو تاریخ میں ”فارم 47 پلس” کے نام سے یاد رکھا جائے گا۔ انہوں نے الزام عائد کیا کہ مسلم لیگ (ن) نے ایک بار پھر تاریخی دھاندلی کے ذریعے “خیراتی مینڈیٹ” حاصل کیا ہے، جبکہ عوام نے 2024ء کی طرح 2026ء میں بھی ن لیگ کے بیانیے کو مکمل طور پر مسترد کر دیا ہے۔ شرجیل میمن نے واضح کیا کہ جعلی اور دھاندلی زدہ مینڈیٹ کے زور پر حکومت تو بنائی جا سکتی ہے لیکن عوام کے دلوں میں سچی مقبولیت اور احترام حاصل نہیں کیا جا سکتا۔

نواز شریف کے شکوے کا جواب دیتے ہوئے صوبائی وزیر نے کہا کہ پیپلز پارٹی سے شکایت کرنے سے پہلے قائد ن لیگ کو آزاد کشمیر کی سیاسی صورتحال اور وہاں پیدا کیے گئے غیر جمہوری حالات پر نظر ڈالنی چاہیے تھی۔ انہوں نے زور دیا کہ پیپلز پارٹی نے ہمیشہ جمہوری اصولوں، ووٹ کے تقدس اور سیاسی رواداری کی پاسداری کی ہے، اور اگر کسی انتخابی عمل کی شفافیت پر سنجیدہ سوالات اٹھیں تو ان پر آواز اٹھانا پیپلز پارٹی کا بنیادی آئینی اور جمہوری حق ہے۔

شرجیل انعام میمن کے ردعمل کے اہم نکات:

جمہوری حق: انتخابات میں ہونے والی بے ضابطگیوں پر خاموش نہیں رہا جا سکتا، تحفظات جمہوری سیاست کا لازمی حصہ ہیں جنہیں محض الزام کہہ کر نظرانداز نہیں کیا جا سکتا۔عدم دشمنی کا اصول: پیپلز پارٹی نہ پہلے کسی سے دشمنی رکھتی تھی اور نہ اب چاہتی ہے، تاہم جمہوریت کے نام پر عوامی مینڈیٹ پر ڈاکہ ڈالنا کسی صورت قبول نہیں۔مریم نواز کے بیان کا جواب: مریم نواز کی جانب سے گلگت بلتستان اور آزاد کشمیر کے انتخابات کا موازنہ کرنا بالکل غیر منطقی اور نامناسب ہے۔طاقت کا بے جا استعمال: اصل مسئلہ سیاسی مخالفت کا نہیں بلکہ اس وقت پیدا ہوتا ہے جب ریاستی طاقت کو عوامی مینڈیٹ کو بلڈوز اور کمزور کرنے کے لیے استعمال کیا جائے۔