نوازشریف نے 15 اگست کو مری میں مسلم لیگ ن کا اجلاس طلب کرلیا

پاکستان مسلم لیگ (ن) کے صدر اور سابق وزیراعظم میاں محمد نواز شریف نے آزاد کشمیر میں نئی حکومت کی تشکیل کے حوالے سے اہم فیصلے کرنے کے لیے 15 اگست کو مری میں اعلیٰ سطحی پارٹی اجلاس طلب کر لیا ہے۔ ذرائع کے مطابق نواز شریف چھانگلہ گلی گلیات سے کشمیر پوائنٹ مری میں واقع اپنی رہائش گاہ پہنچ چکے ہیں، جہاں وہ اس اہم اجلاس کی صدارت کریں گے۔ اجلاس میں وزیراعظم شہباز شریف، وزیراعلیٰ پنجاب مریم نواز اور حمزہ شہباز سمیت پارٹی کی مرکزی قیادت شرکت کرے گی۔

اس اہم سیاسی مشاورت میں وفاقی وزراء، سینئر پارٹی رہنماؤں اور ن لیگ کے تمام نومنتخب اراکین آزاد کشمیر اسمبلی کو بھی مدعو کیا گیا ہے تاکہ حکومت سازی سے متعلق حتمی حکمت عملی طے کی جا سکے۔ ذرائع کا کہنا ہے کہ اجلاس کے دوران آزاد کشمیر میں وزیراعظم کے نام سمیت دیگر اہم عہدوں پر تفصیلی غور و خوض کیا جائے گا۔ وی آئی پی شخصیات کی آمد اور اجلاس کے پیش نظر مری میں سیکیورٹی کے انتہائی سخت اور فول پروف انتظامات کیے گئے ہیں۔