صدر نے وزیراعظم کی جانب سے بھجوائی متعدد سمریوں کی منظوری دے دی

صدرِ مملکت آصف علی زرداری نے وزیراعظم کی جانب سے ارسال کی گئی متعدد اہم سمریوں کی باضابطہ منظوری دے دی ہے۔ صدرِ مملکت نے ملک کی حفاظت اور خدمات کے اعتراف میں مسلح افواج اور سول آرمڈ فورسز کے 1,172 اہلکاروں کو اعلیٰ فوجی اعزازات دینے کی منظوری دی، جبکہ مختلف سول شعبوں میں نمایاں کارکردگی دکھانے والے شہریوں کو بھی قومی اعزازات سے نوازنے کی منظوری دی ہے۔

اس کے علاوہ صدر زرداری نے پارلیمانی امور کی انجام دہی کے لیے 17 اگست کو قومی اسمبلی کا اجلاس شام 5 بجے اور سینیٹ کا اجلاس شام 6 بجے طلب کرنے کی منظوری بھی دی۔ یومِ آزادی اور عید میلاد النبی ﷺ کے مبارک موقع پر انسانی ہمدردی کے تحت صدر مملکت نے اہل قیدیوں کی سزاؤں میں 100 روز کی خصوصی معافی کا بھی اعلان کیا ہے، جس کی سمری کی باقاعدہ منظوری دے دی گئی ہے۔