گوگل کی جیمینائی ایپ کے صارفین کی تعداد 1 ارب سے تجاوز کرگئی

ٹیکنالوجی کی دنیا کی معروف کمپنی گوگل کی آرٹیفیشل انٹیلی جنس ایپ ’جیمینائی‘ نے ایک بڑا سنگِ میل عبور کر لیا ہے، جس کے ماہانہ فعال صارفین (Monthly Active Users) کی تعداد 1 ارب سے تجاوز کر گئی ہے۔ گوگل کے چیف ایگزیکٹو آفیسر (سی ای او) سندر پچائی نے سوشل میڈیا پلیٹ فارم ’ایکس‘ پر اس پیش رفت کا اعلان کرتے ہوئے بتایا کہ جیمینائی 1 ارب صارفین کی حد عبور کرنے والی گوگل کے ماحولیاتی نظام کی 14ویں پروڈکٹ بن گئی ہے۔

یہ تاریخی کامیابی ایک ایسے وقت میں سامنے آئی ہے جب عالمی سطح پر اے آئی مارکیٹ میں کمپنیوں کے درمیان مسابقت انتہائی شدید ہو چکی ہے۔ اس پیش رفت کے بعد جیمینائی نے اوپن اے آئی کے ‘چیٹ جی پی ٹی’ کا کامیابی سے مقابلہ کرتے ہوئے خود کو مضبوطی سے قائم کیا ہے۔ گوگل نے واضح کیا ہے کہ 1 ارب صارفین کی یہ تعداد صرف جیمینائی کی اپنی ایپ کے استعمال کنندگان پر مشتمل ہے، جس میں گوگل سرچ، ورک اسپیس یا اینڈرائیڈ کے دیگر الگ تھلگ فیچرز کے ذریعے اے آئی استعمال کرنے والے افراد شامل نہیں ہیں۔

کمپنی کی جانب سے جاری کردہ تفصیلات کے مطابق جیمینائی کے 63 فیصد صارفین وائس فیچر کا استعمال کرتے ہوئے اے آئی اسسٹنٹ سے براہ راست گفتگو کرتے ہیں، جبکہ یہ پلیٹ فارم اب روزانہ 150 ملین (15 کروڑ) سے زائد تصاویر بھی تیار کر رہا ہے۔ جیمینائی کی مقبولیت صرف اینڈرائیڈ تک محدود نہیں رہی بلکہ ایپل کے ‘آئی او ایس’ (iOS) پر بھی اس کے فعال صارفین کی تعداد 100 ملین (10 کروڑ) سے تجاوز کر چکی ہے، جو کہ اس ایپ کی تیزی سے بڑھتی مقبولیت کی عکاسی کرتی ہے۔