پیپلزپارٹی نے آزادکشمیر کے الیکشن کو متنازعہ بنانے کی کوشش کی: طارق فضل چودھری

وفاقی وزیر طارق فضل چوہدری نے کہا ہے کہ پاکستان پیپلز پارٹی نے آزاد کشمیر کے انتخابات کو بلاوجہ متنازع بنانے کی کوشش کی ہے اور اس سلسلے میں سیاسی وضع داری کے تقاضوں کا خیال نہیں رکھا گیا۔ ایک نجی ٹی وی شو ’آن دی فرنٹ‘ میں گفتگو کرتے ہوئے ان کا کہنا تھا کہ اگر پیپلز پارٹی کے پاس دھاندلی کے کوئی ثبوت موجود تھے تو انہیں عوامی سطح پر سامنے لایا جانا چاہیے تھا۔

وفاقی وزیر نے طنز کرتے ہوئے کہا کہ ’الٹی گنتی‘ کے تمام دعوے محض سیاسی بیانات تک محدود ہیں۔ شکایت آزاد کشمیر سے متعلق ہے جبکہ پریس کانفرنس کراچی سے کی جا رہی ہے۔ انہوں نے اعلان کیا کہ تمام تر سیاسی تحفظات کے باوجود آئندہ ہفتے آزاد کشمیر میں نئی حکومت کا قیام عمل میں آ جائے گا۔

طارق فضل چوہدری نے مزید کہا کہ ججز پر کرمنل ریکارڈ سے متعلق باتیں اور الزامات بالکل بے بنیاد ہیں۔ انہوں نے پاکستان تحریک انصاف پر تنقید کرتے ہوئے کہا کہ پی ٹی آئی خود شدید اندرونی تقسیم کا شکار ہے اور 27 ستمبر کو موجودہ حکومت کو کسی قسم کا کوئی خطرہ نہیں ہے۔ انہوں نے واضح کیا کہ اسلام آباد میں کسی بھی قسم کے مسلح جتھوں کو داخل ہونے کی ہرگز اجازت نہیں دی جائے گی۔