فراری کمانڈر نور خان نے 60 ساتھیوں سمیت سوئی میں ہتھیارڈال دیے

صوبہ بلوچستان کے ضلع ڈیرہ بگٹی سے تعلق رکھنے والے کالعدم تنظیم کے اہم فراری کمانڈر نور خان بگٹی نے اپنے ساتھیوں سمیت وزیراعلیٰ بلوچستان میر سرفراز بگٹی کے سامنے ہتھیار ڈال دیے ہیں۔ سرکاری اعلامیے کے مطابق یہ اہم پیش رفت پاکستان ہاؤس سوئی میں وزیراعلیٰ بلوچستان کی زیر صدارت منعقدہ ایک کھلی کچہری کے دوران سامنے آئی، جہاں نور خان بگٹی نے اپنے ساتھیوں سمیت ریاستی رِٹ کو تسلیم کرتے ہوئے باضابطہ طور پر ہتھیار ڈال دیے اور پرامن پاکستانی شہری کی حیثیت سے زندگی گزارنے کا عزم کیا۔

اس موقع پر تقریب کے دوران فراری کمانڈر نور خان بگٹی اور ان کے تمام ساتھیوں نے ریاست پاکستان کے ساتھ مکمل وفاداری کا حلف بھی اٹھایا۔ حکام کی جانب سے جاری کردہ تفصیلات کے مطابق نور خان بگٹی گزشتہ 20 سال سے پہاڑوں میں روپوش تھے اور اس طویل عرصے کے دوران وہ سیکیورٹی فورسز اور تنصیبات پر ہونے والی متعدد دہشت گردانہ کارروائیوں میں ملوث رہے تھے۔

سرکاری اعلامیے میں مزید بتایا گیا ہے کہ نور خان بگٹی نے اپنے اہل خانہ سمیت مجموعی طور پر 60 افراد کے ہمراہ ہتھیار پھینکے ہیں، جو اب طویل روپوشی ختم کر کے قومی دھارے میں واپس آ چکے ہیں۔ حکومت بلوچستان کی جانب سے اعلان کیا گیا ہے کہ سرینڈر کرنے والے سابق فراری کمانڈر نور خان بگٹی اور ان کا خاندان اب سوئی میں ہی پرامن طریقے سے آباد ہوگا۔