روسی تیل تنصیبات پر حملوں کی صورت میں امریکا کی یوکرین کو ہتھیاروں کی فراہمی روکنےکی دھمکی

امریکی انتظامیہ نے روس کی توانائی تنصیبات اور تیل صاف کرنے والے کارخانوں (آئل ریفائنریز) پر  یوکرینی حملے رکوانے کے لیے سخت دباؤ بڑھاتے ہوئے کیف حکومت کو ہتھیاروں کی فراہمی اور عسکری امداد معطل کرنے کی براہِ راست دھمکی دی ہے۔ بین الاقوامی میڈیا اور یورپی حکام کے مطابق، گزشتہ ہفتے کے آخر میں موصول ہونے والی امریکی بریفنگز اور ٹیلی فونک رابطوں میں یہ بات سامنے آئی ہے کہ واشنگٹن یوکرین اور یورپی اتحادیوں پر مسلسل لابنگ کر رہا ہے تاکہ روسی انرجی انفراسٹرکچر کو نشانہ بنانے کا سلسلہ بند کیا جا سکے۔

یورپی حکام نے انکشاف کیا ہے کہ امریکی دباؤ کے اس پیغام میں انٹیلی جنس معلومات کے تبادلے کے نظام اور عسکری سازوسامان کی فراہمی کے اہم نیٹ ورک ‘پرل’ (Pearl) کو معطل کرنے یا منقطع کرنے کی واضح دھمکیاں بھی شامل ہیں۔ اس دوران اتوار کے روز امریکی صدر ڈونلڈ ٹرمپ کے ایک اچانک بیان نے یوکرین اور یورپی ممالک کو حیرت میں مبتلا کر دیا، جب انہوں نے سوشل میڈیا پر اعلان کیا کہ روس اور یوکرین کے درمیان ایک دوسرے کے توانائی کے بنیادی ڈھانچے پر حملے روکنے پر اتفاق ہو گیا ہے۔

واضح رہے کہ اس پیش رفت سے چند روز قبل امریکی صدر ٹرمپ نے یہ اعلان بھی کیا تھا کہ روسی صدر ولادیمیر پوٹن کے ساتھ ہونے والی انتہائی کامیاب گفتگو کے نتیجے میں روس امریکا اور عالمی منڈی کو فوری طور پر 3 لاکھ ٹن سے زائد ڈیزل فراہم کرے گا۔ صدر ٹرمپ کے مطابق، طے پانے والے سمجھوتے کے تحت روس رواں سال نومبر میں مزید 5 لاکھ ٹن اور اس کے بعد اضافی 10 لاکھ ٹن ڈیزل عالمی مارکیٹ کو فراہم کرے گا