موبائل فونزبرآمد ہونے پر اڈیالہ جیل کے 3 قیدی اٹک جیل منتقل

سینٹرل جیل اڈیالہ راولپنڈی میں سرپرائز تلاشی کے دوران سنگین مقدمات میں ملوث 3 قیدیوں سے موبائل فونز برآمد ہونے پر انتظامیہ نے سخت ایکشن لیتے ہوئے تمام قیدیوں کو فوراً اٹک جیل منتقل کر دیا ہے، جبکہ فرائض میں غفلت برتنے کے الزام میں 5 جیل ملازمین کو معطل کر دیا گیا۔

جیل ذرائع کے مطابق اڈیالہ جیل میں تلاشی کے عمل کے دوران ذیل میں درج تین قیدیوں سے موبائل فونز برآمد ہوئے راجہ رعد: ٹریفک وارڈن کے قتل کیس کا سزا یافتہ قیدی ملک حماد: محکمہ جیل خانہ جات پنجاب کے ملازم کے قتل کیس میں پابندِ سلاسل قیدی شازیب ولد اکرم: سنگین جرم میں قید قیدی۔

جیل انتظامیہ نے معاملے کی سنگینی کو دیکھتے ہوئے نہ صرف تینوں خطرناک قیدیوں کو اٹک جیل منتقل کیا بلکہ سیکیورٹی کی خامی اور غفلت کے مرتکب 5 پولیس اہلکاروں و جیل ملازمین کو فوری طور پر معطل کر کے ان کے خلاف باضابطہ انکوائری کا آغاز کر دیا ہے۔