ایمازون کے بانی کی جیف بیزوز کی اے آئی ٹیکنالوجی کے حوالے سے حیران کن پیشگوئی

عالمی معروف ای کامرس کمپنی ‘ایمازون’ (Amazon) کے بانی جیف بیزوز نے آرٹی فیشل انٹیلی جنس (اے آئی) کے مستقبل اور روزگار پر اس کے اثرات کے حوالے سے ایک حیران کن اور مثبت پیشگوئی کی ہے۔ ان کا ماننا ہے کہ اے آئی ٹیکنالوجی کی بدولت آنے والے دور میں لوگ کم دن کام کرکے بھی اپنے لیے اور اپنے خاندان کے لیے کافی زیادہ آمدنی حاصل کر سکیں گے۔

امریکی خبر رساں ادارے ‘فاکس نیوز’ کو دیے گئے ایک خصوصی انٹرویو میں جیف بیزوز نے کہا کہ اے آئی ٹیکنالوجی کی ترقی کے باعث لوگوں کو ہفتے میں محض چند گھنٹے یا صرف 3 دن کام کرنا پڑے گا، اور اس کے باوجود وہ اپنے خاندان کی بہترین کفالت کے لیے معقول اور مناسب معاوضہ کما سکیں گے۔ انہوں نے مزید کہا کہ اس جدید ٹیکنالوجی کی بدولت مستقبل میں صرف ایک فرد کی آمدنی ہی پورے گھرانے کی ضروریات اور کفالت کے لیے کافی ثابت ہوگی۔

جیف بیزوز نے اس تاثر کو یکسر رد کر دیا کہ اے آئی ٹیکنالوجی انسانوں کی ملازمتوں کے لیے خطرہ ہے۔ ان کا کہنا تھا کہ اس ٹیکنالوجی سے بیروزگاری بڑھنے کے بجائے کاروباری اداروں اور کمپنیوں کو الٹا افرادی قوت کی شدید کمی کا سامنا ہو سکتا ہے، کیونکہ لوگ اپنی مرضی سے کم دن کام کرنے کو ترجیح دیں گے۔ ان کے مطابق اے آئی کی مدد سے کمپنیاں کم وسائل کے باوجود زیادہ پیداوار حاصل کر سکیں گی جس سے مجموعی معیارِ زندگی میں نمایاں بہتری آئے گی۔ تاہم انہوں نے یہ تسلیم کیا کہ ہفتے میں 3 دن کام کرنے کی یہ پیشگوئی راتوں رات پوری نہیں ہوگی بلکہ اس کا انحصار معاوضوں، کام کے دورانیے اور اقتصادی عوامل پر ہوگا۔