سرکس کے دوران خاتون کا تیر شوہر کی گردن میں جا لگا

امریکہ کی ریاست نیویارک میں ایک سرکس شو کے دوران خطرناک کرتب پیش کرتے ہوئے خوفناک حادثہ پیش آیا، جہاں خاتون فنکار کے کراس بو (تیر کمان) سے نکلا تیر غلطی سے ان کے شوہر کی گردن میں جا پیوست ہوا۔ پولیس کے مطابق یہ واقعہ اورنج کاؤنٹی میں پیش آیا جب 42 سالہ آنا دازا اور ان کے 38 سالہ شوہر ایڈون کیورو شارپ شوٹنگ کا مظاہرہ کر رہے تھے۔ شوہر کے ہاتھ میں موجود ہدف سے ہٹ کر تیر ان کی گردن پر لگا، جس کے بعد انہیں فوری طور پر ایئر ایمبولینس کے ذریعے ہسپتال منتقل کیا گیا۔ ڈاکٹروں اور سرکس انتظامیہ کے مطابق خوش قسمتی سے تیر سے کوئی اہم رگ یا شریان متاثر نہیں ہوئی اور زخمی کی حالت خطرے سے باہر ہے۔ پولیس نے واقعے کی تحقیقات شروع کر دی ہیں تاہم ابتدائی رپورٹ میں اسے محض ایک اتفاقی حادثہ قرار دیا گیا ہے۔