ٹرمپ نے ایران کو سفارتکاری کا موقع دینے کیلئے حملے روکے: مائیک والٹز

اقوام متحدہ میں امریکی سفیر مائیک والٹز نے کہا ہے کہ صدر ڈونلڈ ٹرمپ نے ایران پر حملوں میں عارضی وقفہ دے کر سفارتکاری کے لیے گنجائش پیدا کی ہے اور تہران کو مذاکرات کا ایک نادر موقع فراہم کیا ہے۔ امریکی میڈیا سے گفتگو کرتے ہوئے انہوں نے بتایا کہ صدر ٹرمپ مذاکرات کو مزید وقت دینا چاہتے ہیں، تاہم انہوں نے ان بات چیت کے خد و خال کی مزید تفصیلات ظاہر نہیں کیں۔

امریکی اخبار ‘نیویارک ٹائمز’ اور میڈیا رپورٹس کے مطابق وائٹ ہاؤس کے اعلیٰ سطحی اجلاس میں نائب صدر جے ڈی وینس اور جوائنٹ چیفس آف اسٹاف کے چیئرمین جنرل ڈین کین نے ایران کے خلاف کارروائیاں بڑھانے پر تحفظات ظاہر کیے تھے۔ جنرل ڈین کین نے خبردار کیا کہ مسلسل حملوں سے امریکی سینٹرل کمان کے پاس انٹرسیپٹر میزائلوں کے ذخائر خطرناک حد تک کم ہو سکتے ہیں، جبکہ ان حملوں کے نتیجے میں ایران اندرونی طور پر مزید متحد ہوا ہے۔

دوسری جانب عمانی وفد کے دورۂ ایران اور سفارتی کوششوں کے باعث بھی 13 روز سے جاری فوجی کارروائیاں روکی گئی ہیں۔ صدر ڈونلڈ ٹرمپ نے صحافیوں سے گفتگو کرتے ہوئے کہا کہ اگرچہ ان کے پاس حملے جاری رکھنے کا پورا اختیار ہے، لیکن اس وقت ‘اسمارٹ حکمت عملی’ یہی ہے کہ سفارت کاری کو موقع دیتے ہوئے ایران کے ساتھ کسی مستحکم معاہدے تک پہنچنے کی کوشش کی جائے۔