طلبہ کی مدد کیلئے مصنوعی ذہانت سے چلنے والا انسانی روبوٹ متعارف

امریکی ریاست نیویارک کے ایک ہائی سکول میں تدریسی عمل کو جدید بنانے کے لیے تقریباً 57,600 امریکی ڈالرز کی لاگت سے مصنوعی ذہانت سے لیس انسانی شکل کا روبوٹ بطور معاون ٹیچر متعارف کرا دیا گیا ہے۔ یہ روبوٹ ابتداء میں گیارہویں اور بارہویں جماعت کے طلبہ کو کوڈنگ، روبوٹکس اور AI جیسے مضامین سکھانے میں اساتذہ کی مدد کرے گا۔ انسان جیسی جلد، بھورے بال اور متحرک ہاتھوں کی خصوصیات سے لیس یہ روبوٹ چلنے کی صلاحیت نہیں رکھتا اور ایک جگہ نصب ہے۔ سکول انتظامیہ کے مطابق روبوٹ کا مقصد اساتذہ کا متبادل بننا نہیں بلکہ طلبہ میں تخلیقی سوچ اور ٹیکنالوجی کی سوجھ بوجھ پیدا کرنا ہے۔ سوشل میڈیا پر ہونے والی تنقید کے جواب میں انتظامیہ نے واضح کیا کہ روبوٹ انٹرنیٹ سے منسلک نہیں ہے اور طلبہ کی کسی قسم کی ویڈیو، آواز یا ذاتی معلومات جمع نہیں کرتا، جبکہ بنیادی تدریسی ذمہ داری انسانی اساتذہ ہی سنبھالیں گے۔