امریکی صدر کی ہدایت پر ایران کے خلاف بڑے فضائی حملوں کا آغاز، تہران کی عسکری صلاحیتوں کو نشانہ بنانا شروع کر دیا، سینٹ کام کا باضابطہ اعلان

امریکی فوج کی سینٹرل کمانڈ (سینٹ کام) نے باضابطہ طور پر تصدیق کر دی ہے کہ صدر ڈونلڈ ٹرمپ کی براہِ راست ہدایت پر امریکی افواج نے ایران کے خلاف نئے اور بڑے پیمانے پر فضائی حملوں کا آغاز کر دیا ہے۔ پینٹاگون کو ملنے والے گرین سگنل کے بعد امریکی جنگی طیاروں اور میزائلوں نے ایرانی حدود اور ان کی فوجی تنصیبات کو نشانہ بنانا شروع کر دیا ہے، جس سے خطے کی صورتحال انتہائی کشیدہ ہو گئی ہے۔

سینٹ کام کی جانب سے جاری کردہ ہنگامی بیان میں کہا گیا ہے کہ ان فضائی حملوں کے تین بنیادی مقاصد ہیں۔ اول، تزویراتی طور پر اہم سمندری گزرگاہ ‘آبنائے ہرمز’ میں بین الاقوامی تجارتی جہاز رانی کو درپیش ایرانی خطرات سے محفوظ بنانا؛ دوم، مستقبل میں کسی بھی کارروائی کے لیے ایران کی عسکری صلاحیتوں کو مزید کمزور کرنا؛ اور سوم، گزشتہ رات اردن میں امریکی فوجی اڈے پر بیلسٹک میزائل حملے کر کے امریکی فوجیوں کو ہلاک و زخمی کرنے والی ایرانی فورسز کو فوری اور عبرت ناک سزا دینا ہے۔ عسکری مبصرین کے مطابق، ان حملوں کے بعد مشرقِ وسطیٰ میں ایک وسیع علاقائی جنگ کا خطرہ حقیقی شکل اختیار کر گیا ہے۔