طبی تعلیم اور تحقیق میں پاک-امریکہ تعاون کا بڑا معاہدہ؛ نیویارک میں ایم او یو پر دستخط،

وفاقی وزیر منصوبہ بندی، ترقی و خصوصی اقدامات پروفیسر احسن اقبال کے دورہ نیویارک کے دوران وزارت منصوبہ بندی اور نیویارک یونیورسٹی میں قائم پاکستانی میڈیکل اینڈ ڈینٹل اسٹوڈنٹس ایسوسی ایشن (PMDSA) کے درمیان تعاون کی ایک اہم مفاہمتی یادداشت (MoU) پر دستخط کیے گئے ہیں۔ اس تقریب میں امریکا میں پاکستان کے سفیر رضوان سعید شیخ بھی موجود تھے۔ اس معاہدے کا بنیادی مقصد طبی تعلیم، تحقیق، جدت اور استعداد کار میں اضافے کے لیے پاکستان اور امریکا کے درمیان تعاون کو مضبوط بنانا ہے۔ اس کے تحت پاکستانی طلبہ کو رہنمائی اور داخلوں میں معاونت فراہم کی جائے گی اور سمندر پار پاکستانی طبی طلبہ کا پاکستان کے تعلیمی و صحت کے اداروں کے ساتھ رابطہ مضبوط کیا جائے گا۔ فیکلٹی ممبران، طبی ماہرین اور طلبہ سے خطاب کرتے ہوئے وفاقی وزیر احسن اقبال نے زور دیا کہ نوجوانوں پر سرمایہ کاری حکومت کی اولین ترجیح ہے اور حکومت پاک-امریکہ تعلیمی شراکت داری کو وسعت دینے کے لیے پرعزم ہے تاکہ آرٹیفیشل انٹیلیجنس، بائیوٹیکنالوجی اور ڈیٹا سائنس جیسے جدید شعبوں میں نوجوانوں کو مہارت فراہم کر کے ملک کو نالج اکانومی میں تبدیل کیا جا سکے۔ اپنے دورے کے دوران وفاقی وزیر نے نیویارک یونیورسٹی کالج آف ڈینٹسٹری اور بیلیویو ہاسپٹل سینٹر کا بھی دورہ کیا اور طلبہ کو تحقیق و جدت کے ذریعے پاکستان کا سفیر بننے کی ترغیب دی۔