امریکا کے مسلسل آٹھویں رات ایران پر حملے، آبنائے ہرمز کے قریبی شہروں میں دھماکے

اردن میں 2 امریکی فوجیوں کی ہلاکت کے بعد خطے میں کشیدگی انتہائی خطرناک حد تک بڑھ گئی ہے، جہاں امریکی صدر ڈونلڈ ٹرمپ کے حکم پر پینٹاگون نے ایران پر پوری شدت سے بمباری کا آغاز کر دیا ہے۔ امریکی سینٹرل کمانڈ (سینٹکام) نے مسلسل 8ویں رات کارروائی کرتے ہوئے ایران کے اسٹریٹجک بندرگاہی شہروں خوزستان اور ہرمزگان کے مختلف علاقوں کو نشانہ بنایا ہے۔ ایرانی میڈیا کے مطابق امریکی طیاروں نے صبح 5 بج کر 55 منٹ پر شادگان اور 6 بج کر 10 منٹ پر جزیرہ قشم پر میزائل داغے، جہاں کم از کم 2 دھماکے سنے گئے۔ اس کے علاوہ سریک، بندر عباس اور بندر لنگہ میں بھی رات 1 بج کر 30 منٹ پر شدید بمباری کی گئی۔ دوسری جانب سینٹکام نے اعلان کیا ہے کہ امریکی وقت کے مطابق رات 11:30 بجے ایران کے خلاف حملوں کا ایک اور مرحلہ کامیابی سے مکمل کر لیا گیا ہے، جس میں پاسدارانِ انقلاب (IRGC) کی فضائی دفاعی تنصیبات، بحری صلاحیتوں اور میزائل و ڈرون ذخیرہ گاہوں کو نشانہ بنایا گیا ہے۔ سینٹکام کے مطابق اس وقت مشرقِ وسطیٰ میں 50 ہزار سے زائد امریکی فوجی ہائی الرٹ پر تعینات ہیں۔