ایران کے جنوبی علاقوں میں دھماکوں کی آوازیں سنی گئی ہیں، ایرانی میڈیا

امریکی صدر ڈونلڈ ٹرمپ کی خصوصی ہدایت پر امریکی افواج نے ایران کے خلاف نئے فضائی حملے شروع کر دیے ہیں، جس کے بعد ایران کے متعدد جنوبی علاقوں میں زوردار دھماکوں کی آوازیں سنی گئی ہیں۔

ایرانی میڈیا کے مطابق، امریکی فضائیہ نے جنوبی ایران کے صوبہ ہرمزگان کے ساحلی علاقے ‘سیریک’ کو نشانہ بنایا ہے۔ اس کے علاوہ ایران کے اہم بندرگاہی شہر ‘بندر عباس’ میں بھی متعدد زوردار دھماکوں کی آوازیں سنی گئی ہیں، جس سے قریبی علاقوں میں خوف و ہراس پھیل گیا۔

میڈیا رپورٹس میں مزید بتایا گیا ہے کہ امریکی فوج نے ان تازہ حملوں کے دوران ‘حاجی آباد’ شہر کے قریبی علاقوں کو بھی نشانہ بنایا ہے۔ ایرانی حکام اور میڈیا کی جانب سے تاحال ان حملوں کے نتیجے میں ہونے والے کسی بھی قسم کے جانی یا مالی نقصان کی حتمی تفصیلات جاری نہیں کی گئی ہیں۔

دوسری جانب، امریکی سینٹرل کمانڈ (سینٹ کام) نے حملوں کی تصدیق کرتے ہوئے کہا ہے کہ یہ کارروائی صدر ڈونلڈ ٹرمپ کے احکامات پر عمل میں لائی گئی ہے تاکہ ایرانی فوجی صلاحیتوں کو نشانہ بنایا جا سکے۔ ان فضائی حملوں کے بعد خطے میں کشیدگی انتہائی سنگین حد تک بڑھ گئی ہے۔