جنوبی ایشیا میں پائیدار امن اور خوشحالی مسئلہ کشمیر کے حل سے وابستہ ہے: صدر، وزیراعظم

صدرِ مملکت آصف علی زرداری اور وزیراعظم محمد شہباز شریف نے کشمیری عوام کی لازوال جدوجہدِ آزادی کو شاندار خراجِ تحسین پیش کرتے ہوئے کہا ہے کہ جنوبی ایشیا میں پائیدار امن و خوشحالی کا انحصار مسئلۂ جموں و کشمیر کے منصفانہ اور پرامن حل سے وابستہ ہے، جسے اقوامِ متحدہ کی سلامتی کونسل کی متعلقہ قراردادوں اور کشمیریوں کی امنگوں کے مطابق حل ہونا چاہئے۔ یومِ الحاقِ پاکستان کے موقع پر اپنے الگ الگ پیغامات میں صدر آصف زرداری نے کہا کہ یہ دن کشمیری عوام کی تاریخی امنگوں کی یاد دلاتا ہے اور پاکستان کشمیریوں کے ناقابلِ تنسیخ حقِ خودارادیت کی سیاسی، سفارتی اور اخلاقی حمایت مستقل جاری رکھے گا۔ دوسری جانب وزیراعظم شہباز شریف نے اپنے پیغام میں واضح کیا کہ ہر سال 19 جولائی کو یہ دن اس تاریخی اور متفقہ قرارداد کی یاد میں منایا جاتا ہے جو 19 جولائی 1947 کو سری نگر میں آل جموں و کشمیر مسلم کانفرنس کے اجلاس میں منظور کی گئی تھی، جو برصغیر کی تاریخ میں کشمیریوں کی اجتماعی سیاسی امنگوں اور پاکستان سے الحاق کی خواہش کا عکاس ہے۔ دونوں رہنماؤں نے عالمی برادری اور اقوامِ متحدہ پر زور دیا کہ وہ مقبوضہ وادی میں انسانی حقوق کی سنگین خلاف ورزیوں کا نوٹس لیتے ہوئے اپنی قراردادوں پر عمل درآمد یقینی بنانے کے لیے مؤثر کردار ادا کریں۔