ڈی جی آئی ایس پی آر کی سمر کیمپ 2026 میں شریک طلبہ و طالبات کے ساتھ خصوصی نشست

ڈائریکٹر جنرل انٹر سروسز پبلک ریلیشنز (ڈی جی آئی ایس پی آر) نے سمر کیمپ 2026 میں شریک طلبہ و طالبات کے ساتھ ایک خصوصی نشست کا اہتمام کیا، جس میں قومی سلامتی، دہشت گردی اور ملک کو درپیش معاصر چیلنجز پر تفصیلی روشنی ڈالی گئی۔ آئی ایس پی آر کے اس سمر کیمپ میں پاکستان بھر کے 18 سے زائد شہروں سے نویں سے بارہویں جماعت کے 4 ہزار سے زائد طلبہ و طالبات شریک ہیں۔ اس موقع پر شرکا کا کہنا تھا کہ انہیں پاکستان کو درپیش داخلی و بیرونی سیکیورٹی چیلنجز سمیت بلوچستان میں بھارتی پراکسی ‘فتنہ الہندوستان’ اور ‘فتنہ الخوارج’ کی دہشت گردی کے ناپاک کردار کے بارے میں مؤثر آگہی حاصل ہوئی۔ طلبہ و طالبات نے موجودہ دور میں غلط معلومات اور پروپیگنڈے کے خلاف شعور بیدار کرنے کی ضرورت پر زور دیتے ہوئے اس عزم کا اظہار کیا کہ دہشت گردی کے خلاف پوری قوم پاک افواج کے شانہ بشانہ کھڑی ہے۔ آئی ایس پی آر کے مطابق، یہ سمر کیمپ نوجوانوں میں قومی شعور بیدار کرنے اور ان کی صلاحیتوں کو نکھارنے کی جانب ایک اہم پیش رفت ہے۔