گوگل پلے سے VK اور Max ایپس ہٹا دی گئیں، روسی کمپنی نے متبادل ذرائع بتا دیئے

روسی ٹیکنالوجی کمپنی وی کے (VK) نے تصدیق کی ہے کہ گوگل نے اس کی مقبول ایپلی کیشنز VK اور Max کو اپنے پلے اسٹور سے ہٹا دیا ہے۔ کمپنی کی جانب سے جاری کردہ اعلامیے کے مطابق، اس اقدام کے باوجود جن اینڈرائیڈ صارفین کے موبائل فونز میں یہ ایپس پہلے سے انسٹال ہیں، وہ انہیں بدستور معمول کے مطابق استعمال کر سکیں گے اور انہیں پیغامات، کالز اور دیگر پش نوٹیفکیشنز (Push Notifications) بھی موصول ہوتی رہیں گی۔ کمپنی نے صارفین کو مشورہ دیا ہے کہ وہ ان ایپس کو ڈاؤن لوڈ یا اپ ڈیٹ کرنے کے لیے روس کے اپنے اسٹور RuStore سمیت Huawei AppGallery، Samsung Galaxy Store اور Xiaomi GetApps جیسے متبادل پلیٹ فارمز کا استعمال کر سکتے ہیں۔ یاد رہے کہ اس سے قبل ایپل بھی یکطرفہ طور پر وی کے ہولڈنگ کی ایپس اور میکس میسنجر کو اپنے ایپ اسٹور سے ہٹا چکا ہے، جس کے بعد آئی فون صارفین کو پش نوٹیفکیشنز کی موصولی میں مشکلات کا سامنا ہے۔