اے آئی سے لیس مائیکرو ڈرونز مچھروں کے خاتمے کیلئے تیار

امریکی ٹیکنالوجی اسٹارٹ اپ “ٹورنایول” نے مصنوعی ذہانت (AI) سے لیس ایسے جدید ترین مائیکرو ڈرونز تیار کرنے کا دعویٰ کیا ہے جو فضا میں اڑتے ہوئے مچھروں کا تعاقب کر کے انہیں کامیابی سے نشانہ بنا سکتے ہیں۔ مشہور سرمایہ کار ادارے “وائی کومبینٹر” کی معاونت سے کام کرنے والی اس کمپنی کا مقصد روایتی اور کیمیائی اسپرے کے مقابلے میں مچھروں کے خاتمے کی لاگت کو ۱۰۰ گنا تک کم کرنا ہے۔ کمپنی کے شریک بانی الیکس توسان اور کلوویس پیڈالو کے مطابق، صرف ۴۰ گرام وزنی ان مائیکرو ڈرونز میں اسمارٹ فون مائیکروفونز، الٹراسونک سینسرز اور جدید سافٹ ویئر نصب ہیں، جو مچھروں کے پروں کی حرکت سے پیدا ہونے والی مخصوص ڈوپلر آواز کے ذریعے ان کی درست شناخت کرتے ہیں۔ کمپنی نے ایک تجرباتی ویڈیو بھی جاری کی ہے جس میں ڈرون کو کامیابی سے ایک اڑتے ہوئے پتنگے کو نشانہ بناتے دکھایا گیا ہے۔ انجینئرز کا ماننا ہے کہ مستقبل میں ایسے محض ۱۰ چھوٹے ڈرونز کا غول ایک مربع کلومیٹر کے شہری علاقے میں مچھروں کی آبادی پر قابو پا کر صحتِ عامہ کے شعبے میں انقلابی تبدیلی لا سکتا ہے۔