پاکستانی سفارتخانہ واشنگٹن میں مینگو فیسٹیول: امریکی و پاکستانی کمیونٹی کی شرکت

واشنگٹن ڈی سی میں سفارت خانہ پاکستان کے زیراہتمام منعقدہ روایتی “مینگو فیسٹیول” میں امریکی حکام، سفارت کاروں اور پاکستانی نژاد امریکی کمیونٹی نے بھرپور انداز میں شرکت کی۔ تقریب میں واشنگٹن اور گردونواح کی ریاستوں سے تعلق رکھنے والے پالیسی سازوں، تھنک ٹینکس، میڈیا نمائندوں اور امریکی شہریوں کی بڑی تعداد شریک ہوئی۔ سفیرِ پاکستان رضوان سعید شیخ اور ان کی اہلیہ لبنیٰ رضوان نے مہمانوں کا پرجوش استقبال کیا اور انہیں لذیذ پاکستانی آموں اور اس سے تیار کردہ مختلف لذیذ پکوان پیش کیے۔ تقریب سے خصوصی خطاب کرتے ہوئے امریکی رکنِ کانگریس اور خارجہ امور کمیٹی کے رکن ریان زنکے نے پاک امریکہ تعلقات کی اہمیت پر زور دیتے ہوئے کہا کہ دونوں ممالک کے مابین دوستی اس وقت تاریخ کی بلند ترین سطح پر ہے۔ اس موقع پر سفیرِ پاکستان رضوان سعید شیخ کا کہنا تھا کہ پاکستانی آموں کا ذائقہ ہماری زرعی مہارت اور ثقافتی شناخت کا لاثانی حصہ ہے، اور آج کی یہ شام پاکستانی آموں کی مٹھاس کے ذریعے پاک امریکہ سفارتی و عوامی تعلقات کو مزید گہرا اور مضبوط بنانے کا بہترین ذریعہ ثابت ہوئی ہے۔