امریکا صدر ٹرمپ کی تصویر والا ایک ڈالر کا سکہ جاری کرے گا

امریکی وزیرِ خزانہ سکاٹ بیسنٹ نے اعلان کیا ہے کہ یو ایس منٹ (US Mint) ملک کی 250 ویں سالگرہ کے موقع پر صدر ڈونلڈ ٹرمپ کی تصویر والا ایک ڈالر کا یادگاری سکہ تیار کرے گا۔ برطانوی خبر رساں ادارے کے مطابق، اس سکے کے سامنے کے رخ پر لبرٹی، “اِن گاڈ وی ٹرسٹ” اور “2026-1776” کے الفاظ درج ہوں گے جبکہ پچھلی جانب عقاب کا ڈیزائن بنایا گیا ہے۔ یہ ڈیزائن اس سے قبل اکتوبر میں پیش کیے گئے اس مسودے کی ترمیم شدہ شکل ہے جس میں ٹرمپ کو قاتلانہ حملے کے بعد فضا میں مکا لہراتے ہوئے اور گرد “فائٹ، فائٹ، فائٹ” لکھے دکھانے کی تجویز تھی۔ صدر ٹرمپ نے اس فیصلے کو اپنے لیے باعثِ عزت اور غیر معمولی قرار دیا ہے۔ دوسری جانب، ناقدین نے اس پر قانونی سوالات اٹھاتے ہوئے 1866 کے امریکی قانون اور 2020 کے ایک ایکٹ کا حوالہ دیا ہے جن کے تحت کسی زندہ شخص کی تصویر امریکی کرنسی پر نہیں لگائی جا سکتی۔ تاہم، وزیرِ خزانہ بیسنٹ کا مؤقف ہے کہ یہ پابندی صرف کاغذی نوٹوں پر لاگو ہوتی ہے اور اس سے قبل 150 ویں سالگرہ پر اس وقت کے برسرِاقتدار صدر کیلون کولج کی تصویر بھی سکے پر نقش کی جا چکی ہے، اس لیے یہ اقدام بالکل قانونی ہے۔