پیمرا 8 کروڑ 75 لاکھ روپے سے زائد کے واجبات وصول کرنے میں ناکام

پاکستان الیکٹرانک میڈیا ریگولیٹری اتھارٹی (پیمرا) کے مالیاتی امور سے متعلق آڈیٹر جنرل کی ایک تشویش ناک آڈٹ رپورٹ سامنے آئی ہے، جس کے مطابق پیمرا انتظامیہ 8 کروڑ 75 لاکھ روپے سے زائد کے واجبات وصول کرنے میں بری طرح ناکام رہی ہے۔ رپورٹ میں انکشاف کیا گیا ہے کہ اتھارٹی کو مختلف خلاف ورزیوں پر عائد کیے گئے جرمانوں کی مد میں بھی 74 لاکھ روپے کی رقم وصول نہیں ہو سکی، جبکہ کیبل ٹی وی، سیٹلائٹ ٹی وی اور ایف ایم ریڈیو چینلز سے بقایاجات کی ریکوری بھی تعطل کا شکار ہے۔ آڈیٹر جنرل آف پاکستان نے واجبات کی عدم وصولی کو پیمرا ترمیمی ایکٹ 2023 کی کھلی خلاف ورزی اور انتظامیہ کی سنگین غفلت قرار دیا ہے۔ رپورٹ کے مطابق، دستاویز کی تکمیل تک پیمرا انتظامیہ اس آڈٹ اعتراض کا کوئی معقول جواب دینے میں ناکام رہی۔ آڈٹ رپورٹ میں سفارش کی گئی ہے کہ تمام بقایا واجبات کو فوری طور پر وصول کیا جائے اور مستقبل میں ریکوری کے نظام کو فول پروف اور مضبوط بنایا جائے۔