ساہیوال سے غیرقانونی سموں کی فروخت میں ملوث خاتون گرفتار

پاکستان ٹیلی کمیونیکیشن اتھارٹی (PTA) نے ملک بھر میں غیر قانونی طور پر فعال سموں کی خرید و فروخت کے خلاف کریک ڈاؤن مزید تیز کر دیا ہے، جس کے تحت ایک بڑی کارروائی میں ساہیوال سے ایک خاتون کو گرفتار کر لیا گیا ہے۔ پی ٹی اے کی باقاعدہ شکایت پر نیشنل سائبر کرائم انویسٹی گیشن ایجنسی (NCCIA) نے ساہیوال میں چھاپہ مار کر ملزمہ کے قبضے سے مختلف موبائل کمپنیوں کی مجموعی طور پر 329 غیر قانونی طور پر فعال سمیں برآمد کر لیں۔ ابتدائی تحقیقات کے مطابق، گرفتار ملزمہ بڑے پیمانے پر غیر قانونی سموں کی خرید و فروخت کے ایک منظم نیٹ ورک کا حصہ تھی اور تفتیش کے دوران مختلف شہروں میں سموں کی ترسیل، کورئیر ریکارڈ اور غیر قانونی لین دین سے متعلق اہم شواہد بھی حاصل کر لیے گئے ہیں۔ قانون نافذ کرنے والے اداروں نے ملزمہ کے خلاف مقدمہ درج کر کے تفتیش کا دائرہ وسیع کر دیا ہے تاکہ اس نیٹ ورک میں شامل دیگر عناصر کو بھی جلد از جلد قانون کے کٹہرے میں لایا جا سکے۔