امریکی نوجوانوں میں حماس کی حمایت میں اضافہ؛ اسرائیل کی حمایت میں کمی؛ سروے

امریکا کے معروف معتبر ادارے ‘پیو ریسرچ سینٹر’ کے مئی 2026 میں کیے گئے ایک تازہ اور چونکا دینے والے سروے سے ظاہر ہوا ہے کہ امریکی عوام، بالخصوص نوجوان نسل اور ڈیموکریٹک ووٹرز میں اسرائیل کے بارے میں مثبت رائے میں نمایاں کمی آئی ہے جبکہ حماس کے لیے نرم گوشہ بڑھا ہے۔ 12 ہزار 574 بالغ امریکیوں پر مشتمل اس سروے کے مطابق، 18 سے 29 سال کے 13 فیصد امریکی نوجوان حماس کے بارے میں مثبت رائے رکھتے ہیں، جبکہ 44 فیصد مسلم امریکیوں نے بھی حماس کے حق میں رائے دی جو 2024 کے مقابلے میں 7 فیصد زیادہ ہے۔ سروے کے مطابق، اسرائیلی عوام کے بارے میں منفی تاثر 25 فیصد سے بڑھ کر 42 فیصد ہو گیا ہے، جبکہ اسرائیلی حکومت کے خلاف منفی رائے رکھنے والوں کی شرح 43 فیصد سے بڑھ کر 62 فیصد تک پہنچ گئی ہے۔ دوسری جانب، فلسطینی عوام کے لیے امریکیوں کی ہمدردی مستحکم ہے اور 30 سال سے کم عمر 58 فیصد نوجوانوں نے فلسطینیوں کے حق میں مثبت رائے دی ہے۔ سیاسی وابستگی کے لحاظ سے 72 فیصد نوجوان ڈیموکریٹس فلسطینیوں کے حامی دکھائی دیے، جبکہ ریپبلکن ووٹرز میں بھی 2023 کے بعد سے اسرائیل کے لیے روایتی حمایت میں کمی ریکارڈ کی گئی ہے۔ ماہرین کا کہنا ہے کہ یہ نتائج غزہ جنگ کے بعد امریکی رائے عامہ میں آنے والی ایک بڑی تبدیلی کی نشاندہی کرتے ہیں۔