خبردار! آپ کی فیس بک پوسٹ کسی سائبر کرائم مافیا کی منفی سرگرمی کا ذریعہ بن سکتی ہے

سائبر سیکیورٹی ماہرین نے فیس بک صارفین کو سخت انتباہ جاری کرتے ہوئے کہا ہے کہ وہ سوشل میڈیا پر کوئی بھی پوسٹ شیئر کرنے سے پہلے اچھی طرح سوچ لیں، کیونکہ مستقبل میں پبلک پوسٹس کو مصنوعی ذہانت (AI) کے ذریعے آسانی سے تلاش کیا جا سکے گا۔ رپورٹس کے مطابق فیس بک اپنے سرچ سسٹم میں ایک نیا اے آئی چیٹ اسسٹنٹ فیچر متعارف کرانے کی تیاری کر رہا ہے، جس کے بعد روایتی الفاظ کے بجائے براہِ راست سوالات کے ذریعے صارفین کی برسوں پرانی عوامی پوسٹس، تبصروں اور ذاتی معلومات تک چند لمحوں میں رسائی ممکن ہو جائے گی۔ ماہرین نے خدشہ ظاہر کیا ہے کہ اس جدید ترین فیچر سے جہاں معلومات تلاش کرنا آسان ہوگا، وہیں سائبر جرائم میں ملوث عناصر بھی اس کا فائدہ اٹھا کر صارفین کو آن لائن فراڈ یا دھوکا دہی کا نشانہ بنا سکتے ہیں۔ سیکیورٹی ماہرین نے صارفین کو مشورہ دیا ہے کہ وہ اپنی پرائیویسی سیٹنگز کو فوری طور پر ‘پبلک’ سے ‘فرینڈز’ پر منتقل کریں اور فیس بک کی “Limit Past Posts” سہولت استعمال کر کے ماضی کا تمام پبلک ڈیٹا محدود کریں تاکہ ان کی آن لائن سیکیورٹی محفوظ رہ سکے۔