ایندھن مہنگا ہونے پر امریکی ایئر لائنز کے مئی کے اخراجات میں 3 ارب ڈالر کا اضافہ

ایران جنگ کے باعث عالمی سطح پر ایندھن مہنگا ہونے کی وجہ سے مئی کے مہینے میں امریکی ایئر لائنز کے ایندھن کے اخراجات میں 3 ارب ڈالر سے زائد کا بھاری اضافہ ریکارڈ کیا گیا ہے۔

امریکی محکمہ ٹرانسپورٹ کی جانب سے جاری کردہ اعداد و شمار کے مطابق، مئی 2026ء میں امریکی ایئر لائنز کے ایندھن پر آنے والے مجموعی اخراجات 85 فیصد بڑھ کر تقریباً 6.7 ارب ڈالر تک پہنچ گئے۔ اس کے مقابلے میں گزشتہ سال (مئی 2025ء) ایئر لائنز نے ایندھن کی مد میں 3.62 ارب ڈالر خرچ کیے تھے، جو رواں سال اسی ماہ بڑھ کر 6.66 ارب ڈالر ہو گئے۔

محکمہ ٹرانسپورٹ نے مزید بتایا کہ مئی میں جیٹ فیول (ہوائی جہاز کے ایندھن) کی قیمت 4.09 ڈالر فی گیلن رہی۔ یہ قیمت مئی 2025ء کے مقابلے میں 1.88 ڈالر فی گیلن زیادہ ہے۔ ماہرین کے مطابق، خطے میں جاری جنگ اور سپلائی چین میں پیدا ہونے والے تعطل نے ہوائی سفر کی صنعت پر مالی بوجھ انتہائی حد تک بڑھا دیا ہے۔