چین کا آبدوز سے سٹریٹجک میزائل چلانے کا کامیاب تجربہ

چین نے بحرالکاہل میں آبدوز سے اسٹریٹجک میزائل چلانے کا کامیاب تجربہ کیا ہے، جس پر آسٹریلیا، نیوزی لینڈ اور جاپان جیسے علاقائی ممالک نے گہری تشویش کا اظہار کیا ہے۔

چینی سرکاری خبر رساں ایجنسی کے مطابق، ڈمی وارہیڈ (غیر مسلح ہتھیار) سے لیس اس تجرباتی میزائل کو بحرالکاہل میں ایک طویل فاصلے پر متعین کردہ ہدف کی جانب داغا گیا جہاں وہ اپنے مقررہ مقام پر گر گیا۔ چینی حکام کا کہنا ہے کہ یہ میزائل تجربہ ان کے معمول کے فوجی تربیتی پروگرام کا حصہ تھا جو مکمل طور پر بین الاقوامی قوانین کے عین مطابق کیا گیا، اور اس سلسلے میں متعلقہ ممالک کو پیشگی اطلاع بھی دے دی گئی تھی۔ چینی میڈیا نے واضح کیا کہ اس تجربے میں کسی خاص ملک یا ہدف کو نشانہ نہیں بنایا گیا۔

عالمی برادری اور ہمسایہ ممالک کا ردعمل چینی دعووں کے باوجود خطے کے اہم ممالک نے اس تجربے کو امن کے لیے خطرہ قرار دیا ہے جاپانی حکام نے تصدیق کی کہ انہیں ٹیسٹ سے متعلق پہلے آگاہ کر دیا گیا تھا، تاہم انہوں نے بیجنگ انتظامیہ سے اس انتہائی حساس معاملے پر نظرثانی کرنے کا مطالبہ کیا تھا۔  آسٹریلیا کی وزیرِ خارجہ پینی وونگ نے کہا کہ چین نے ٹیسٹ سے متعلق آگاہ تو کیا تھا، لیکن کینبرا کا مؤقف ہے کہ اس قسم کے بیلسٹک میزائل ٹیسٹ پورے خطے کے لیے شدید عدم استحکام کا باعث بن سکتے ہیں۔ دلچسپ بات یہ ہے کہ چین کے اس ٹیسٹ کی تصدیق ایسے وقت میں ہوئی جب آسٹریلیا نے بحرالکاہل میں واقع اپنے ہمسایہ جزیرے فجی کے ساتھ ایک اہم دفاعی معاہدے پر دستخط کیے۔  نیوزی لینڈ نے بھی اس تجربے پر سخت تحفظات کا اظہار کیا ہے۔ وزیرِ خارجہ ونسٹن پیٹرز کا کہنا تھا کہ جوہری صلاحیت رکھنے والے طویل فاصلے تک مار کرنے والے میزائل کا یہ تجربہ علاقائی استحکام اور امن کی کوششوں سے مطابقت نہیں رکھتا۔