صدر رجب طیب اردوان کی حمایت سے پاکستان کو ثالثی کا کردار ملا: وزیراعظم

وزیراعظم شہباز شریف نے کہا ہے کہ ترکیہ کے صدر رجب طیب اردوان کی مخلصانہ حمایت کی بدولت پاکستان کو ایک اہم ثالثی کا کردار ملا، جس کے باعث امریکا اور ایران کے درمیان مذاکراتی عمل میں پاکستان نے خلوصِ نیت سے کوششیں کیں اور جنگ بندی ممکن ہوئی۔

ترکیہ میں بی ٹو بی (B2B) بزنس کانفرنس سے خطاب کرتے ہوئے وزیراعظم شہباز شریف کا کہنا تھا کہ استنبول ایک خوبصورت شہر ہے جو ایشیا اور یورپ کو آپس میں ملاتا ہے، جبکہ ترکیہ پاکستان کا ایک انتہائی مضبوط اور مخلص اتحادی ہے۔ انہوں نے دونوں ممالک کے تاریخی اور لازوال تعلقات کا ذکر کرتے ہوئے کہا کہ ان تعلقات کی بنیاد ترکیہ کی جنگِ آزادی کے دوران رکھی گئی تھی، جب برصغیر کے مسلمانوں نے علی برادران کی قیادت میں ترکیہ کی جدوجہدِ آزادی کی بھرپور مہم چلائی اور حمایت کی تھی۔

وزیراعظم نے کہا کہ ترکیہ نے ہر مشکل وقت میں پاکستان کا ساتھ دیا ہے۔ ایران اور امریکا کے درمیان ثالثی کے حوالے سے گفتگو کرتے ہوئے انہوں نے واضح کیا کہ یہ ایک نہایت کٹھن سفارتی مشن تھا، تاہم اللہ کے فضل سے جنگ بندی ممکن ہو سکی۔ اب ضروری ہے کہ امن کے اس موقع سے بھرپور فائدہ اٹھایا جائے اور نئے امکانات کو دوطرفہ تعاون اور علاقائی خوشحالی کے لیے استعمال کیا جائے۔

شہباز شریف نے صدر طیب اردوان کی قیادت کو سراہتے ہوئے کہا کہ آج ترکیہ کا صنعتی منظرنامہ مکمل طور پر تبدیل ہو چکا ہے، جس سے دونوں ممالک کے درمیان تجارت، سرمایہ کاری اور اقتصادی تعاون کے فروغ کے لیے نئی راہیں ہموار ہو رہی ہیں۔ انہوں نے مزید کہا کہ ترکیہ نے حالیہ برسوں میں غیر معمولی کامیابیاں حاصل کی ہیں اور پاکستان ان کے تجربات سے استفادہ کرنا چاہتا ہے۔

اپنے خطاب کے دوران ماضی کا حوالہ دیتے ہوئے انہوں نے کہا کہ فیلڈ مارشل کی قیادت میں افواجِ پاکستان نے دشمن کو وہ کرارا جواب دیا جو تاریخ کا حصہ ہے۔ جب بھی پاکستان پر جنگ مسلط کی گئی، ہم نے اپنی خودمختاری اور وقار کا ڈٹ کر دفاع کیا، اور ان تمام مشکل حالات میں ترکیہ، سعودی عرب اور دیگر دوست ممالک نے ہمیشہ پاکستان کے مؤقف کی کھل کر حمایت کی۔