چمٹے کی تال سے دنیا کو مسحور کرنے والے عالم لوہار کی 47 ویں برسی آج منائی جارہی ہے

پاکستان کے مایہ ناز لوک اور صوفی گلوکار عالم لوہار کی 47 ویں برسی آج 3 جولائی کو عقیدت و احترام سے منائی جا رہی ہے۔ تقریباً نصف صدی بیت جانے کے باوجود ان کی سحر انگیز آواز، چمٹے کی مخصوص تھاپ اور صوفیانہ گائیکی کا منفرد انداز آج بھی دنیا بھر میں موجود موسیقی کے شائقین کے دلوں میں زندہ ہے۔

یکم مارچ 1928 کو ضلع گجرات کے نواحی گاؤں میں پیدا ہونے والے عالم لوہار نے بچپن سے ہی سُروں کی دنیا میں قدم رکھ دیا تھا۔ روایتی رنگ برنگا کرتا، چست پاجامہ اور ہاتھ میں چمٹا ان کی ایسی منفرد پہچان بنے کہ وہ جہاں بھی جاتے، میلہ لوٹ لیتے۔ انہوں نے پنجاب کی لوک کہانیوں خصوصاً ‘ہیر رانجھا’، ‘سیف الملوک’ اور ‘مرزا صاحباں’ کو اپنی مخصوص طرز میں گا کر امر کر دیا۔ ان کی گائی ہوئی ‘جگنی’ آج بھی لوک موسیقی کا ایک لازمی حصہ سمجھی جاتی ہے۔

عالم لوہار نے چمٹے کو صرف ایک پس منظر کے ساز کے طور پر نہیں بلکہ ایک مرکزی آلۂ موسیقی کے طور پر متعارف کروایا، جس نے پنجابی موسیقی کو ایک نئی توانائی اور شناخت دی۔ انہوں نے نہ صرف پاکستان بلکہ عالمی سطح پر بھی ملک کا نام روشن کیا اور لوک ثقافت کو بین الاقوامی اسٹیج پر متعارف کروایا۔ موسیقی کی دنیا کا یہ درخشندہ ستارہ 3 جولائی 1979 کو ایک ٹریفک حادثے میں مداحوں سے بچھڑ گیا تھا، لیکن ان کا ورثہ ان کے بیٹے عارف لوہار کی صورت میں آج بھی زندہ ہے