افغانستان سے بھارتی حمایت یافتہ دہشت گردوں کی دراندازی ناکام، 15 ہلاک

پاک فوج نے ضلع شمالی وزیرستان میں پاک افغان سرحد پر بھارتی حمایت یافتہ  دہشت گردوں کی دراندازی کی کوشش کو ناکام بناتے ہوئے 36 گھنٹے جاری رہنے والے آپریشن میں 15 دہشت گردوں کو جہنم واصل کر دیا ہے۔ پاک فوج کے شعبہ تعلقات عامہ (ISPR) کے مطابق افغان طالبان حکومت اپنی سرزمین پاکستان کے خلاف استعمال ہونے سے روکنے اور مؤثر سرحدی انتظام یقینی بنانے میں مکمل ناکام رہی ہے۔ آئی ایس پی آر نے واضح کیا کہ سیکیورٹی فورسز ملک کے دفاع کے لیے غیر متزلزل عزم رکھتی ہیں اور ’عزمِ استحکام‘ کے تحت انسدادِ دہشت گردی کارروائیاں جاری رہیں گی۔ وزیراعظم شہباز شریف نے اس کامیاب آپریشن پر فورسز کے افسران اور جوانوں کی پیشہ ورانہ مہارت اور شجاعت کو خراجِ تحسین پیش کرتے ہوئے کہا کہ ملک سے دہشت گردی کے ناسور کے خاتمے تک یہ جنگ پوری قوت سے جاری رہے گی۔