نائب وزیراعظم اسحاق ڈار کا گندم ذخائر کا جائزہ اجلاس: 10 لاکھ میٹرک ٹن گندم کی درآمد کا اعادہ، صوبوں کو فوری فراہمی کی ہدایت

نائب وزیراعظم اسحاق ڈار کی زیر صدارت ملک میں گندم کے موجودہ ذخائر، قیمتوں کے استحکام اور ذخیرہ اندوزی کی روک تھام سے متعلق اہم جائزہ اجلاس منعقد ہوا۔ اجلاس کے دوران ملک میں گندم کی مناسب دستیابی اور صارفین کو ریلیف کی فراہمی یقینی بنانے کے لیے 10 لاکھ میٹرک ٹن گندم درآمد کرنے کے فیصلے کا اعادہ کیا گیا۔ نائب وزیراعظم نے ٹریڈنگ کارپوریشن آف پاکستان (TCP) کو فوری طور پر درآمدی عمل شروع کرنے کی ہدایت کی، جس کے تحت پہلے مرحلے میں ڈھائی لاکھ میٹرک ٹن گندم درآمد کی جائے گی جس کی ترسیل نومبر میں متوقع ہے۔ علاوہ ازیں اسحاق ڈار نے پاسکو (PASSCO) کو منظور شدہ کوٹے کے مطابق صوبوں کو گندم فوری فراہم کرنے جبکہ صوبائی حکومتوں کو بروقت ادائیگی اور اٹھان یقینی بنانے کی سخت ہدایت کی ہے۔