ایکسائز بلوچستان کی بڑی کارروائی، 74 ارب کی منشیات سمگلنگ کی کوشش ناکام بنا دی

ایکسائز اینڈ اینٹی نارکوٹکس ساؤتھ زون بلوچستان نے گڈانی کی ساحلی پٹی پر تاریخی کارروائی کرتے ہوئے بیرون ملک منشیات اسمگل کرنے کی بڑی کوشش ناکام بنا دی ہے۔ آپریشن کے دوران 1 ہزار 13 کلوگرام (ایک ٹن 13 کلوگرام) خالص آئس (کرسٹل میتھ) برآمد کی گئی، جس کی عالمی مارکیٹ میں مالیت 74 ارب 19 کروڑ روپے سے زائد بتائی گئی ہے۔ ڈی جی ایکسائز ساؤتھ زون محمد زمان کے مطابق اس کامیاب اقدام سے عالمی ڈرگ مافیا کو اربوں روپے کا مالی دھچکا پہنچا ہے۔ انہوں نے بتایا کہ گزشتہ دو سال کے دوران ساحلی حدود سے 133 ارب 56 کروڑ روپے مالیت سے زائد کی آئس، چرس اور غیر ملکی شراب ضبط کی جا چکی ہے، اور نوجوان نسل کے تحفظ و ساحلی پٹی کو منشیات سے پاک کرنے کے لیے بلاامتیاز کارروائیاں مزید تیز کی جائیں گی