سانحہ 9 مئی کیسز: ڈاکٹر یاسمین راشد اور عمر سرفراز چیمہ کی درخواست ضمانت پر سماعت ملتوی

انسدادِ دہشت گردی عدالت لاہور میں پاکستان تحریک انصاف کی رہنما ڈاکٹر یاسمین راشد اور سابق گورنر پنجاب عمر سرفراز چیمہ کی ضمانت کی درخواستوں پر سماعت ملتوی کر دی گئی ہے۔ جج شاہد سکندر کے روبرو سماعت کے دوران ڈاکٹر یاسمین راشد کے وکیل نے دلائل کے لیے مزید مہلت طلب کی، جس پر عدالت نے ان کی درخواستِ ضمانت پر سماعت 10 ستمبر تک ملتوی کر دی۔ دوسری جانب عمر سرفراز چیمہ کے وکیل کے پیش نہ ہونے پر ان کی سماعت 14 ستمبر تک ملتوی کر دی گئی۔ عدالت نے دونوں ملزمان کے وکلاء کو آئندہ سماعتوں پر دلائل مکمل کرنے کی سخت ہدایت کی ہے۔ واضح رہے کہ ڈاکٹر یاسمین راشد نے عسکری ٹاور حملے سمیت دو مقدمات، جبکہ عمر سرفراز چیمہ نے جناح ہاؤس اور عسکری ٹاور حملے سمیت تین مقدمات میں ضمانت کی درخواستیں دائر کر رکھی ہیں