یسین ملک کا بھارتی عدلیہ پر اظہارِ عدم اعتماد، مقدمہ مزید لڑنے سے انکار

حریت رہنما یسین ملک نے سری نگر کی عدالت میں 25 صفحات پر مشتمل حلف نامہ جمع کرواتے ہوئے اپنا مقدمہ مزید لڑنے سے انکار کر دیا ہے اور واضح کیا ہے کہ انہیں بھارتی عدالتوں سے انصاف کی کوئی توقع نہیں ہے۔ 1990 کے سرلا بھٹ قتل کیس میں جھوٹے الزامات کی دوٹوک تردید کرتے ہوئے انہوں نے کہا کہ بھارتی حکومت 36 سال بعد ایک سیاسی سازش کے تحت انہیں پھانسی دینا چاہتی ہے، مگر وہ اپنا معاملہ اللہ پر چھوڑتے ہیں اور کشمیر کے لیے سزائے موت بھی قبول کرنے کو تیار ہیں۔ حلف نامے میں طویل قید، تنہائی اور اہل خانہ سے جدائی کا ذکر کرتے ہوئے یسین ملک نے اپنی اہلیہ مشعال ملک کو بھی اپنی رفاقت سے آزاد کرنے کی خواہش کا اظہار کیا۔ انہوں نے انکشاف کیا کہ ماضی میں بھارتی حکام نے خود ان سے پاکستان کے ساتھ تعلقات میں مثبت کردار ادا کرنے کو کہا اور بعد میں اسی کو بطور ثبوت استعمال کیا۔ سیاسی ماہرین کا کہنا ہے کہ یسین ملک کا یہ قدم مودی حکومت کے سیاسی انتقام اور کشمیری قیادت کو خاموش کرنے کی کوششوں کے خلاف ایک تاریخی احتجاج ہے۔