لاہور ہائیکورٹ کے جسٹس راحیل کامران شیخ نے استعفیٰ دے دیا

لاہور ہائیکورٹ کے جسٹس راحیل کامران شیخ نے آئین کے آرٹیکل 206 کے تحت اپنے عہدے سے استعفیٰ دے دیا ہے اور اپنا استعفیٰ صدرِ پاکستان کو ارسال کر دیا ہے۔ 7 مئی 2021 کو بطور ایڈیشنل جج تعینات ہونے والے جسٹس راحیل کامران 5 سال 3 ماہ اور 27 دن منصب پر فائز رہے اور سنیارٹی لسٹ میں 27 ویں نمبر پر تھے۔ انہوں نے اپنے استعفے میں عدالتی خدمات کو باعثِ فخر قرار دیتے ہوئے کہا کہ آئین اور قانون کی حکمرانی کے عزم کے ساتھ بنچ چھوڑ رہا ہوں، جبکہ مستعفی ہونے کے بعد انہوں نے قانونی سکالرشپ، پالیسی ریسرچ اور تقابلی عدالتی پریکٹس سے وابستہ ہونے کے فیصلے کا اظہار کیا ہے۔ واضح رہے کہ جسٹس راحیل کامران نے اپنے دورِ ملازمت میں 126 رپورٹڈ فیصلے جاری کیے اور ان کی ریٹائرمنٹ جنوری 2036 میں متوقع تھی۔