افغان سرحد کی بندش اور خلیجی تنازع سے 3 ارب ڈالر کی تجارت متاثر ہوئی: وزیر تجارت جام کمال

وفاقی وزیر تجارت جام کمال نے قائمہ کمیٹی برائے تجارت کے اجلاس کے بعد میڈیا سے گفتگو کرتے ہوئے بتایا کہ افغانستان کے ساتھ بارڈر کی بندش سے ایک ارب ڈالر، جبکہ خلیجی ممالک میں کشیدگی و جنگی حالات کے باعث دو ارب ڈالر کی تجارتی سرگرمیاں متاثر ہوئی ہیں۔ ان کا کہنا تھا کہ خلیجی ریاستوں نے متبادل منڈیوں کا رخ کر لیا ہے، تاہم ملک میں چین سے ٹیکسٹائل سیکٹر میں جلد بھاری سرمایہ کاری متوقع ہے، جس کے تحت مشترکہ مصنوعات تیار کر کے عالمی منڈیوں کو بھیجی جائیں گی۔ جام کمال نے اعتراف کیا کہ مہنگی بجلی اور پیداواری لاگت پاکستان کے لیے عالمی سطح پر مقابلے کی راہ میں بڑی رکاوٹ ہیں، تاہم بھارتی سبسٹڈی کے باوجود پاکستانی باسمتی چاول نے عالمی مارکیٹ میں اپنا مقام برقرار رکھا ہے۔ برآمدات میں کمی اور ساڑھے سات ارب ڈالر کے تجارتی خسارے سے متعلق صحافی کے سوال پر وفاقی وزیر نے واضح جواب دینے کے بجائے مبہم موقف اختیار کیا۔