بغیر بجلی کے سمندری پانی کو پینے کے قابل بنانے والی ٹیکنالوجی تیار

چائنیز اکیڈمی آف سائنسز اور شینزن یونیورسٹی کے سائنسدانوں نے ایک ایسا انقلابی پروٹوٹائپ آلہ تیار کر لیا ہے جو بغیر بجلی اور فوسل فیول کے، محض سورج کی روشنی کی مدد سے سمندر کے کھارے پانی کو پینے کے صاف پانی میں تبدیل کر سکتا ہے۔ ساؤتھ چائنا مارننگ پوسٹ کی رپورٹ کے مطابق، یہ نئی ٹیکنالوجی نانو پارٹیکلز اور تھری ڈی (3D) اسٹرکچر پر مبنی ایک نئے فوٹو تھرمل میٹریل کی بدولت ممکن ہوئی ہے، جو 90.2 فیصد سورج کی حرارت کو جذب کرنے کی صلاحیت رکھتا ہے۔ اس سسٹم کے باعث پانی صاف کرنے کی لاگت دکان سے منرل واٹر کی بوتل خریدنے سے بھی کم ہو جائے گی۔ ایک کامیاب کلینیکل ٹرائل کے دوران اس ڈیوائس سے تیار کردہ پانی کو بغیر کسی بجلی کے استعمال کے، ہفتوں تک 5 اسکوائر میٹر زرعی زمین پر کاشتکاری کے لیے بھی استعمال کیا گیا ہے۔ ماہرین کا کہنا ہے کہ بڑے پیمانے پر اس ٹیکنالوجی کے استعمال سے پانی کے حصول کی لاگت میں مزید کمی آئے گی۔