لیزا کُک کو ہٹانے میں ناکام صدر ٹرمپ کے حق میں بڑا فیصلہ

امریکی سپریم کورٹ میں گزشتہ روز کا دن انتہائی ڈرامائی رہا، جہاں صدر ڈونلڈ ٹرمپ کو ایک مقدمے میں بڑی کامیابی ملی، تاہم تین دیگر مقدمات میں انہیں ناکامی کا سامنا کرنا پڑا۔

عدالتِ عظمیٰ نے صدر ٹرمپ کے سرکاری اداروں کے سربراہان کو برطرف کرنے کے صدارتی اختیار میں توسیع کر دی ہے۔ اس فیصلے کے تحت سپریم کورٹ نے 1935 کے تقریباً ایک صدی پرانے تاریخی قانون ’ہمفریز ایگزیکیوٹر بمقابلہ امریکی حکومت‘ کی نظیر کو کالعدم قرار دے دیا ہے، جس کے تحت ماضی میں امریکی صدر ہر وفاقی ادارے کے سربراہ کو اپنی مرضی سے برطرف نہیں کر سکتے تھے۔ امریکی میڈیا کا کہنا ہے کہ اس فیصلے سے وفاقی اداروں کی خودمختاری متاثر ہوئی ہے اور وفاقی حکومت کے انتظامی ڈھانچے میں بڑی تبدیلیوں کا امکان ہے۔ اس فیصلے پر اختلافی نوٹ لکھتے ہوئے جسٹس سونیا سوٹومیئر نے خبردار کیا ہے کہ یہ اقدام “صرف انتشار کا باعث بنے گا۔”

عدالت نے صدر ٹرمپ کی وہ درخواست مسترد کر دی جس میں فیڈرل ریزرو کی گورنر لیزا کُک کو فوری برطرف کرنے کی اجازت مانگی گئی تھی۔ عدالت نے انہیں عہدے پر برقرار رکھا، جس سے فیڈرل ریزرو کی خودمختاری مزید مضبوط ہو گئی ہے۔ سپریم کورٹ نے ان ریاستی قوانین کو برقرار رکھا ہے جن کے تحت انتخابی دن کے بعد موصول ہونے والے ڈاک کے ووٹ بھی شمار کیے جاتے ہیں۔ ٹرمپ اس نظام پر طویل عرصے سے تنقید کر رہے تھے۔ فیصلے کے بعد ٹرمپ نے کانگریس سے ’’سیو امریکا ایکٹ‘‘ منظور کرنے کا مطالبہ کیا ہے تاکہ ڈاک کے ذریعے ووٹنگ کو محدود اور شہریت کے ثبوت کی سخت شرائط نافذ کی جا سکیں . عدالت نے سابق کالم نگار ای جین کیرول کے حق میں آنے والے فیصلے کے خلاف ٹرمپ کی اپیل مسترد کر دی، جس کے بعد اب انہیں ہرجانے کے طور پر 50 لاکھ ڈالر ادا کرنا ہوں گے۔ علاوہ ازیں، عدالت نے ایلن ڈرشووٹز کی سی این این کے خلاف ہتکِ عزت کے مقدمے میں دائر اپیل بھی مسترد کر دی۔