حزب اللہ نے اسرائیل اور لبنان کے درمیان معاہدے کو غلطی قرار دیدیا

حزب اللہ سے تعلق رکھنے والے لبنانی رکنِ پارلیمنٹ امین شیری نے اسرائیل اور لبنان کے درمیان ہونے والے معاہدے کو ایک بڑی غلطی قرار دیتے ہوئے تل ابیب کے ساتھ براہ راست مذاکرات کی سخت مخالفت کی ہے۔

 امین شیری نے کہا کہ اسرائیل کے ساتھ کسی بھی قسم کے براہ راست مذاکرات کا فیصلہ سراسر غلط ہے۔ ان کے مطابق، اسرائیل اب میز پر بیٹھ کر وہ کچھ حاصل کرنے کی کوشش کر رہا ہے جو وہ ماضی کی دو جنگوں میں میدانِ جنگ کے اندر حاصل کرنے میں بری طرح ناکام رہا۔ انہوں نے خدشہ ظاہر کیا کہ اسرائیل اب لبنان کے اندرونی اختلافات کو ہوا دے کر اپنے مذموم مقاصد حاصل کرنا چاہتا ہے۔ رکنِ پارلیمنٹ نے مزید کہا کہ اسرائیل اس معاہدے کے ذریعے لبنان کو مزید رعایتیں دینے کی طرف دھکیل رہا ہے، جبکہ ان کے مطابق لبنان کی جانب سے دریائے لیطانی کے جنوب میں لبنانی فوج کی تعیناتی پر اتفاق دراصل اسرائیلی افواج کے مکمل انخلا کو یقینی بنانے کے مترادف ہے۔