18 سال سے کم عمر کی شادی کیخلاف قانون فیڈرل شریعت کورٹ میں چیلنج

 18 سال سے کم عمر کی شادی کو جرم قرار دینے والے ‘پنجاب چائلڈ میرج ریسٹرینٹ آرڈیننس 2026’ کو وفاقی شرعی عدالت (فیڈرل شریعت کورٹ) میں چیلنج کر دیا گیا ہے۔ یہ درخواست مفتی محمد اسلم نے اپنے وکیل کے ذریعے دائر کی ہے، جس میں گورنر پنجاب کو بذریعہ سیکرٹری اور دیگر متعلقہ حکام کو فریق بنایا گیا ہے۔ درخواست گزار نے مؤقف اختیار کیا ہے کہ آرڈیننس کی شق 2 ڈی، شق 3 اور دیگر متعلقہ دفعات آئین پاکستان اور اسلامی شریعت سے واضح طور پر متصادم ہیں، اور 18 سال سے کم عمر میں شادی کو جرم قرار دینا اسلامی قوانین کے خلاف ہے۔

درخواست میں مزید کہا گیا ہے کہ اگرچہ ریاست کو انتظامی امور اور نظم و ضبط کو برقرار رکھنے کے لیے قانون سازی کا پورا اختیار حاصل ہے، تاہم شریعت کے طے شدہ معاملات میں کسی قسم کی مداخلت کی اجازت نہیں دی جا سکتی۔ درخواست گزار نے عدالت سے استدعا کی ہے کہ پنجاب چائلڈ میرج ریسٹرینٹ آرڈیننس 2026 کی شق 2 سی اور 2 ڈی سمیت دیگر متنازع دفعات کو کالعدم قرار دیا جائے، اور کیس کے حتمی فیصلے تک اس آرڈیننس پر عملدرآمد روکنے کا حکم (اسٹے آرڈر) جاری کیا جائے۔