امریکا، خلیجی ممالک نے آبنائے ہرمز میں بلا رکاوٹ بحری نقل و حرکت ناگزیر قرار دیدی

امریکا اور خلیجی ممالک نے آبنائے ہرمز میں بلا رکاوٹ بحری نقل و حرکت کو علاقائی اور عالمی سلامتی کے لیے ناگزیر قرار دیتے ہوئے واضح کیا ہے کہ اس اہم بحری گزرگاہ میں کسی بھی قسم کا ٹول (فیس) قبول نہیں کیا جائے گا۔

ایک اہم وزارتی اجلاس کے بعد جاری ہونے والے مشترکہ اعلامیے میں کہا گیا ہے کہ خطے میں دیرپا امن کے قیام کے لیے ایران کے بیلسٹک میزائلوں، ڈرونز اور اس کے پراکسی گروپوں سمیت تمام سیکیورٹی خطرات کا ڈٹ کر مقابلہ کرنا انتہائی ضروری ہے۔ اعلامیے میں واشنگٹن اور خلیجی ممالک نے واضح کیا کہ ایران کے ساتھ مستقبل میں تجارت اور سرمایہ کاری صرف مفاہمتی یادداشت پر مکمل عمل درآمد سے ہی مشروط ہوگی۔ خلیج تعاون کونسل (جی سی سی) کے ممالک نے ایران پر عراق میں پراکسی گروپوں کی پشت پناہی کا الزام عائد کرتے ہوئے خلیجی ریاستوں پر ہونے والے حملوں کی شدید مذمت کی۔ تاہم، مشترکہ اعلامیے میں امریکا اور ایران کے درمیان مفاہمتی یادداشت پر دستخط کا خیرمقدم بھی کیا گیا اور اس سفارتی عمل میں پاکستان اور قطر کے مثبت و تعمیری ثالثی کردار کی تعریف کی گئی۔