ایران کا امریکی فوجی ٹھکانوں کو نشانہ بنانے کا دعویٰ

خطے میں جاری شدید عسکری تناؤ کے درمیان ایرانی پاسدارانِ انقلاب (IRGC) نے ایرانی ساحلوں پر ہونے والے حالیہ امریکی فضائی حملوں کے خلاف ایک بڑا دعویٰ کرتے ہوئے کہا ہے کہ انہوں نے مشرقِ وسطیٰ کے خطے میں قائم امریکی فوجی ٹھکانوں کو جوابی کارروائی کا نشانہ بنایا ہے۔ تاہم، پاسدارانِ انقلاب کی اعلیٰ کمانڈ کی جانب سے جاری کردہ اس ہنگامی بیان میں ان مبینہ جوابی حملوں کے مخصوص مقامات، استعمال کیے گئے ہتھیاروں کی نوعیت یا امریکی تنصیبات کو پہنچنے والے ممکنہ جانی و مالی نقصانات کے بارے میں فی الحال کوئی بھی تفصیلی معلومات یا اعداد و شمار جاری نہیں کیے گئے ہیں۔

واضح رہے کہ اس تزویراتی کشیدگی کا آغاز اس وقت ہوا تھا جب پینٹاگون اور امریکی سینٹرل کمانڈ (سینیٹ کام) نے آبنائے ہرمز میں ایران کی جانب سے سنگاپور کے ایک تجارتی بحری جہاز کو ڈرون کے ذریعے نشانہ بنانے کے ردعمل میں ایرانی حدود کے اندر شدید فضائی کارروائی کا دعویٰ کیا تھا۔ امریکی فورسز نے ایران کے ساحلی علاقے سرک کے قریب واقع میزائل اور خودکش ڈرونز کے خفیہ ذخائر (اسٹوریج مقامات) سمیت ساحلی پٹی پر نصب حساس رڈار تنصیبات کو کامیابی سے نشانہ بنانے کا اعلان کیا تھا۔ امریکی حملوں کے فوری بعد ہی ایرانی پاسدارانِ انقلاب نے سخت وارننگ جاری کی تھا کہ اس امریکی جارحیت کا بدلہ ضرور لیا جائے گا اور وہ اس عسکری اقدام کو کسی بھی صورت بغیر ردعمل کے نہیں چھوڑیں گے، جس کے بعد اب ایران کی جانب سے خطے میں امریکی اڈوں پر ان مبینہ جوابی حملوں کا دعویٰ سامنے آیا ہے۔