امریکا ایران مذاکرات کل شروع ہونے کا امکان، صورتحال بہتر ہونے کا دعویٰ

واشنگٹن: امریکا اور ایران کے مابین باقاعدہ مذاکراتی عمل کل سے شروع ہونے کا قوی امکان ظاہر کیا جا رہا ہے جس سے خطے میں جاری کشیدگی میں کمی کی نئی امید پیدا ہو گئی ہے۔ امریکی نائب صدر جے ڈی وینس نے اس اہم سفارتی پیش رفت کی تصدیق کرتے ہوئے بتایا ہے کہ امریکا کی جانب سے اسٹیو وٹکوف اور جیرڈ کشنر مذاکرات کے حتمی عمل کے لیے اس وقت سوئٹزرلینڈ میں موجود ہیں، جہاں دونوں فریقین کے درمیان اہم امور پر بات چیت ہوگی۔

امریکی نائب صدر نے واضح کیا کہ اس وقت آبنائے ہرمز کی بندش سے متعلق کوئی شواہد یا ثبوت موجود نہیں ہیں، جبکہ ایران کے ساتھ سفارتی مذاکرات کی مجموعی صورتحال بتدریج بہتری کی طرف گامزن ہے۔ انہوں نے اشارہ دیا کہ ان کے خود بھی آنے والے دنوں میں سوئٹزرلینڈ جانے کا قوی امکان ہے۔ جے ڈی وینس نے مزید کہا کہ امریکا کو پورا یقین ہے کہ خطے میں جنگ بندی کو برقرار رکھا جا سکتا ہے اور اسی مقصد کے تحت ایران کے ساتھ جاری مذاکراتی عمل کو آگے بڑھانے کے لیے ایک بھرپور موقع دیا جا رہا ہے۔